أحدث عروض شركات الاتصالات في مصر

• الكل يدخل يشارك في الموضوع ده عن أي عرض يعرفه لأي شركة محمول في مصر سواء بداية عرض أو نهايته .
  
  شركات المحمول وبسبب المنافسة بتنزل بعروض مميزة لفترات محدودة ولكن كتير مننا مش بيعرف العرض إلا بعد فترة ويمكن بعد ما يخلص وممكن يعرف بدايته وميعرفش انه خلص .
  
  مثلاً عرض موبينيل السابق اتكلم ببلاش أكيد في ناس معرفتش عنه إلا بعد فترة ، أو ممكن حد عرف بالعرض بس معرفش هيخلص امتى هيفضل يتكلم ويرغي بنفس الطريقة بعد انتهاء العرض وهوا مش عارف انه خلص ، طبعاً ده لو عنده رصيد كتير مش هيعرف إلا لما يسمع الأخت بتقوله عفواً ، ولو كان فاتورة بيته هيتخرب .
  
  أنا شخصياً مريت بالموضوع ده أكتر من مره ، لما ينزل عرض الشركة بتقلب الدنيا اعلانات ولما ينتهي بينتهي من سكات وأكيد كتير منكم مروا بالموضوع ده
  
  عشان كده جتلي فكرة الموضوع ده :
  
  كل واحد يسمع عن عرض جديد يدخل لو مكنش حد كتب عنه يقولنا عليه هيكون هوا أول واحد يعرف الناس وأكيد هيفيد ناس كتيرة ،ولو نهاية العرض متحددة من البداية نقولها كمان عشان الناس تبقى عارفه ، ولو مش متحددة من البداية أول ما تتحدد ندخل ننبه الناس ، ده لو مفيش حد سبقنا .
  
  وحاولوا تدخلوا باستمرار عشان ميفتكوش أي عرض من العروض يكون أي زميل لينا عرفه وقالنا عليه .
  
  عشان ننظم الموضوع :
  
  نكتب إسم الشركة اللي عملت العرض ونسيب سطر ونكتب العرض بمدته المتحددة .